Över uns 100 Jahr
Uns Boßelverein BV „Hoffnung“ Ludwigsdörp is 2019 100 Jahr old warden. Dat is all wat. Man, wat is en Verein, wat maakt en Verein ut? Sünd dat de Regeln un Statuten, sünd dat de Sport und de Wettkampf?
Ne, wat en Verein doch am mesten utmaakt sünd de Minsken, de daarto hören. De Minsken, de sük tosammen doon to Sport, Spööl und Spaaß.
Minsken, de mitnanner wat beleven willen, de de Verein an’t Leven hollen. Man wat weer uns Verein ohn all de, de sük in hör Freetied darför insetten, dat de Verein wiederbestaahn deit. Ik lööv, dat gifft nich vööl Vereine de up een so langen Geschichte torügg kieken und seggen könnt, in aal de Jahren hett dat immer Lü geben, de leep vööl för uns Verein daan hemmt.
Wat weer uns Verein ohn all de Jugendbetreuers, de Anwiesers, de Kecklers und Mäcklers. Wat weer de Verein ohn de Lü, de darför sörgen, dat wi genug Geld in uns Kasse hebben, de de Bidragen inhalen. Ok de Gerätskupp mut deher, Sitzungen muten ovhollen worden und Protokolle muten schreven worden. Well deit dat all? De Minsken in uns Verein.
De beste Bispill för de Tosamenhollt in uns Verein is uns Vereinsheim. Nich laang proten, maaken. Un nu hemmen wi na 97 Jahr een eigen Tohuus. Aver ok hier mut weer wat daan warden: Minsken mutten uprümen, toreggt maken, Drinken bestellen, bauen, utbettern un, un, un…
För de Tokumst wünsken wi uns: Wiederhen vööl Spaaß an uns Heimatsport, ok dat en of anner Winnen bi uns Wettkämpfe un noch völe Jahren Bestand van uns Verein. Un eens mut seggt woarden: Danke! Danke an al de Minsken, de uns Verein in Vergangenheit, Vandaag und ok in Tokums to dat maken, wat he is!
„Lüch up un fleu herut!“
